Aktivitete të ndryshme

Ekspozitë me rastin e ditës së kumtesës, kushtuar viktimave të holokaustit

Në datën 27.01.2008 Drejtoria e Përgjithshme e Arkivave në bashkëpunim me Senatin e Republikës Franceze me rastin e Ditës së Kujtesës organizoi në Paris ekspozitën me titull "ALBANIE 1933-1944, "HONNEUR DE L`HOMME". Dita e Kujtesës është dita e cila u kushtohet viktimave të Holokaustit të shfarosur nga nazistët në vitet 1933-1944. Shqipëria dhe shqiptarët, ndryshe nga vendet e tjera të Europës, gjatë kësaj periudhe, ndihmuan dhe strehuan shumë familje hebrejsh nga vende të ndryshme si Gjermania, Austria, Greqia, Italia, Bullgaria, Serbia etj.

Nëpërmjet dokumenteve të kohës, ekspozita pasqyroi këtë ndihmë të shqiptarëve, pa dallim feje, dhënë hebrenjve. Gjatë viteve 1933-1939 shumë persona me origjinë hebreje iu dha nënshtetësia shqiptare si : albanologut të njohur Norbert Jokl, kurse të tjerë morën leje pune e banimi. Konsullatat shqiptare ne Europë, në Hamburg, Vjenë, Bari, Beograd etj, pajisën shumë hebrej me viza"turistike„ duke i ndihmuar ti shpëtonin persekutimit nazist. Edhe gjatë viteve të luftës kur Shqipëria ishte e pushtuar nga Italia fashiste dhe më pas nga ushtria gjermane, hebrejtë u mbrojtën nga shqiptarët.

Gjithashtu, Drejtoresha e Drejtorisë së Përgjithshme të Arkivave Prof. As. Dr. Znj.Nevila Nika mbajti një kumtesë me titull "Qëndrimi i autoriteteve shqiptare ndaj hebrejve„, në të cilën paraqiti me fakte e dokumente ndihmën që autoritetet u dhanë hebrejve, ndihmë e cila u shpëtoi jetën shumë prej tyre. Ekspozita përmbante dhe shumë foto të hebrejve të cilët jetuan në Shqipëri në vitet 1933-1944, si dhe të familjeve shqiptare tek të cilët ata u strehuan.

Ekspozita "Në besë të Shqiptarit"

Drejtoria e Përgjithshme e Arkivave në bashkëpunim me Kuvendin e Shqipërisë, me rastin e Shoas, Ditës së Kujtesës së Viktimave të Holokaustit, organizoi më 29.01.2008, ekspozitën dokumentare me titull "Në besë të shqiptarit„ kushtuar hebrejve në Shqipëri, të cilët i mbijetuan Holokaustit si dhe familjeve shqiptare të cilët strehuan këta hebrej, duke ndarë me ta çdo gjë, madje duke rrezikuar edhe jetën e tyre.

Në këtë ditë, Kuvendi i Shqipërisë mbajti një seancë të veçantë plenare, ku morën pjesë, Kryeministri i Shqipërisë Z. Sali Berisha, Kryetarja e Kuvendit të Shqipërisë Znj. Jozefina Topalli, Ambasadori Amerikan në Shqipëri Z. John L. Withers II, deputetë, historianë dhe persona të familjeve që strehuan hebrej gjatë Luftës së II Botërore.

Ekspozita u shoqërua me dokumente origjinale të Drejtorisë së Përgjithshme të Arkivave, ku pasqyrohej ndihma e autoriteteve shqiptare dhe kontributi i popullit shqiptar për të ndihmuar dhe strehuar hebrej të ardhur nga vende të ndryshme të Europës.

Me rastin e 95 Vjetorit të Pavarësisë Drejtoria e Përgjithshme e Arkivave në bashkëpunim me Kuvendin e Shqipërisë, organizoi një ekspozitë. Kjo ekspozitë përmbante fotografi të patriotëve shqiptarë që nënshkruan Aktin e Shpalljes së Pavarësisë më 28 Nëntor 1912.

Ajo u paraqit në ambjentet e Hotel "Tirana", ku u mbajt dhe një sesion shkencor me këtë rast, organizuar nga Insituti i Historisë, me pjesëmarrjen e shumë historianëve dhe të Drejtoreshës së Drejtorisë së Përgjithshme të Arkivave, Prof. As. Dr.Nevila Nika.

                                    

Ekspozitë " NDARJA ME PERENDIMIN-1945-1947„

Drejtoria e Përgjithshme e Arkivave në bashkpunim me Kuvendin e Shqipërisë, në 11.10.2007, organizoi ekspozitën në vigjilje të 60-vjetorit te pushkatimit të një grupi deputetësh, me titull " NDARJA ME PERENDIMIN-1945-1947„

Në stendat e kësaj ekspozite u paraqitën dokumente e foto që dëshmojnë veprimtarinë antikombëtare të Partisë Komuniste të Shqipërisë. Në dokumentet e ekspozuara, për herë të parë, pasqyrohen aktakuzat dhe vendimet e trupit gjykues, por edhe urdhërat e dhëna nga diktatori Enver Hoxha për eleminimin e kundërshtarëve politikë dhe të gjithë atyre intelektualëve e patriotëve që nuk pajtoheshin me kursin që po merrte Shqipëria në ato vite.Këto gjyqe shënuan fillimin e ndarjes së Shqipërisë nga Perëndimi.Ekspozita u shoqërua dhe me fotografi të shumta dhe të panjohura, më parë për publikun, nga seancat gjyqësore dhe të personave të akuzuar. Lista e grupit të deputetëve të dënuar me vdekje në vitet 1947-1948:
 

Shefqet Beja; Riza Dani; Riza Alizoti

Sulo Klosi; Enver Sazani; Sheh Karbunara

Selahudin Toto; Irfan Majuni; Tefik Deliallisi              

Hysen Shehu; Salim Kokalari; Ramazan Tabaku

Beqir Cela; Abdyl Kokoshi; Pertef Karagjozi

Mehmet Prishtina; Agathokli Xhitoni; Faik Shehu

Islam Radovicka; Uan Filipi; Syrja Selfo; Hilmi Hysi ; Hasan Reci

Sesion shkencor "Kontributi  i Idriz Seferit  në luftë për çlirim kombëtarë"

Në datat  15-16 tetor u mbajt në Kosovë, Prishtinë,  sesioni shkencor  , me rastin e 80 vjetorit të vdekjes së këtij patrioti. Ky sesion u organizua nga Insituti i Historisë, Prishtinë. Në këtë veprimtari shkencore krahas referuesve nga Kosova, morën pjesë dhe dy arkivistë nga Drejtoria e Përgjithshme e Arkivave, znj. Mira Popoci dhe z. Endrit Musaj. Në kumtesën e tyre me temë  "Kontributi  i Idriz Seferit  në luftë për çlirim kombëtarë", ata paraqitën veprimtarinë patriotike të Idriz Seferit në periudhën 1913-1918, luftën e tij kundër pushtuesëve  Serb e Bullgarë dhe përpjekjet  e tij për bashkim kombëtarë. Më pas në fshatin e lindjes së Idriz Seferit, në Zhegër të Gjilanit, u përurua busti i patriotit, vepër e skulptorit të mirënjohur Odhise Paskali.

Marrëveshje bashkëpunimi midis Kuvendit të Shqipërisë dhe Drejtorisë së Përgjithshme të Arkivave 

Në datën 30.08.2007 në mjediset e Kuvendit të Shqipërisë u nënshkrua një marrëveshje bashkëpunimi midis Kryetares së Kuvendit të Shqipërisë, Znj. Jozefina Topalli dhe Drejtoreshës së Përgjithshme të Arkivave, Prof. As. Dr. Znj. Nevila Nika.

Kjo marrëveshje konsistonte në promovimin e dokumenteve të historisë dhe trashëgimisë së Parlamentit Shqiptar që në fillimet e veprimtarisë së tij, të panjohura dhe të pastudiuara deri tani, si dhe në inkurajimin e bashkëpunimit në interes të mirëfunksionimit të Arkivit të Kuvendit.

Të ftuar ishin specialistë nga Drejtoria e Arkivave, historianë, deputetë, gazetarë etj. Mbas fjalës së rastit që mbajtën drejtueset e dy institucioneve shtetërore, u hap dhe një ekspozitë me dokumente origjinale të viteve `20-`30 që pasqyronin punën e parlamentit të atyre viteve, si procesverbale të punimeve të parlamentit, vendime dhe ligje për cështje të ndryshme etj. Të ftuarit u njohën nga Znj.Nika me dokumentet parlamentare të ekspozitës si dhe me mënyrën e funksionimit të Parlamentit Shqiptar  në atë periudhë.